Veshtire se mund te gjenden ne ndonje pjese tjeter te globit(pervec Shqiperise) qytete qe i kane shpallur lufte gjelberimit...Qytetet shqiptare ngjajne si nje grumbull germadhash,te shemtuar dhe te ndotur...Krimi i betonizimit duhet te ndaloje.
Qendra Rajonale e Mjedisit Shqiperi / Regional Environmental Center AlbaniaRaporti i progresit 2011: Reflektim krahasimor mbi progresin e Shqipërisë në fushën e mjedisit
27 Tetor 2011
Në 12 tetor 2011 Komisioni Evropian publikoi opinionin e tij vjetor mbi politikën e zgjerimit dhe progresin e deritanishëm drejt hyrjes në Bashkimin Evropian të vendeve të Ballkanit Perëndimor, Turqisë dhe Islandës. Po atë ditë u bë publik dhe Raporti i Progresit për Shqipërinë për 2011-ën.
Edhe ditë më vonë pas publikimit, media shqiptare dhe debatet politike ishin tërësisht të pushtuara nga shpjegimet mbi detyrat e parealizuara. Asnjë shpjegim nuk u përmend për mjedisin. Ndërkohë që vlerësimi i përgjithshëm i bërë në Raportin e Progresit, përsa i përket mjedisit në vend përshkruhet si “Progres i vogël”.
Pikërisht, për të sjellë në vëmendjen e të gjithëve, gjetjet e Raportit për këtë vit, Qendra Rajonale e Mjedisit (REC) Shqipëri organizoi një takim të hapur me përfaqësues të organizatave të shoqërisë civile për mjedisin dhe aktorë të fushës, të titulluar “Raporti i progresit 2011: Reflektim krahasimor mbi progresin e Shqipërisë në fushën e mjedisit”.
Në takim ishin, gjithashtu, të pranishëm përfaqësues të Delegacionit të Bashkimit Evropian në Tiranë.
Në fjalën e hapjes drejtori i REC Shqipëri, z. Mihallaq Qirjo, duke i falenderuar të pranishmit për pjesëmarrjen, ndër të tjera theksoi se “Raporti i progresit nuk duhet të jetë vetëm “objekt referimi” vetëm në ditët e para, por një dokument pune përgjatë gjithë vitit.”
“REC Shqipëri do të përpiqet të ndihmojë në reflektimet mbi progresin mjedisor në vend, jo në mënyrë “të zhurmshe”, dhe pikërisht këtij qëllimi i shërben dhe takimi i sotëm, i cili do të sjellë në vëmendjen tuaj, në mënyrë të përmbledhur, të dhënat e raportit, krahasuar me vitet e mëparshme si dhe me vendet e tjera të rajonit të Ballkanit Perëndimor”, shtoi më tej z. Qirjo.
Z. Clive Rombold, drejtor i Sektorit Politik në Delegacionin e Bashkimit Evropian, paraqiti për të pranishmit cështjet më kryesore në lidhje me raportin e progresit, duke vënë në dukje cështjen e 12 prioriteteve kyce, të caktuara nga Komisioni Europian për tu përmbushur nga Shqipëria. Megjithatë, ai theksoi se, edhe pse mjedisi nuk është një prioritet më vete në këto 12 prioritete, ai i përket secilit prej tyre. Mjedisi është specifik, ai nuk mund të jetë një prioritet për tu përmbushur në një moment të caktuar, por një cështje që duhet adresuar sa më shpejt, në mënyrë që në kohën e duhur të ketë arritur standardin e kërkuar. Pikërisht në momentin kur të jeni gati për të hyrë në BE, mjedisi do të jetë një nga sektorët thelbësorë që do i kushtohet vëmendje”.
z. Antoine Avignon, menaxher i Programit për Mjedisin në Delegacionin e Bashkimit Evropian, bëri një përshkrim të kapitullit për mjedisin, pjesë e raportit të progresit, duke u ndalur në cështjet konkrete dhe teknike të secilës prej fushave të përmendura në raport.
Më pas, z. Mihallaq Qirjo vijoi me një prezantim të detajuar të raportit të progresit për Shqipërinë, kapitullin për mjedisin, duke bërë një krahasim të progresit të këtij viti me vitet e kaluara sipas temave më kryesore mjedisore, si dhe një analizë të ecurisë midis gjithë vendeve të Ballkanit Perëndimor për vitin 2011.
Takimi vijoi me diskutime e pyetje nga të pranishmit, të cilët theksuan dhe një herë nevojën për të mbështetur shoqërinë civile dhe organizatat jofitimprurëse në fuqizimin dhe profilizimin e mëtejshëm të tyre, si dhe në angazhimin real duke i dëgjuar dhe bërë pjesë të zgjidhjes së problemeve mjedisore në vend.