Punimet gjysmake
Diel, 31 Maj 2009 19:47
Jeton Ademi
Prishtinë, 29 maj
Ndërtimi dhe zgjerimi i rrugës "Bill Klinton" në Prishtinë, nuk do të bëhet sivjet në tërë rrugën ashtu siç kishte premtuar Komuna e Prishtinës. Kjo për shkak se vetëm gjysma e kësaj rruge do të ndërtohet, kurse pjesa tjetër do të mbetet për vitin e kaluar. Po ashtu edhe planifikimi i fillimit të punimeve lë dyshime se punimet do të mund të përfundojnë para stinës së vjeshtës. Ekrem Rexha, menaxher i Prokurimit në Komunën e Prishtinës, pohoi se të premten është shpallur tenderi për pjesën e parë të ndërtimit të kësaj rruge. "Tenderi është shpallur për ndërtimin e pjesës së parë të rrugës dhe do të jetë i hapur 25 ditë, prej semaforëve kryesorë e deri tek "Ora" në gjatësi prej 420 metrash", - tha Rexha. Kurse, pjesa tjetër e mbetur sipas tij nuk mund të ndërtohet sivjet për shkak të punimeve që janë duke u bërë në dalje të kësaj rruge në ndërtimin e rrethit. "Pjesa e tjetër e rrugës duhet të harmonizohet me rrethin që është duke u ndërtuar dhe për këtë arsye punimet në këtë pjesë të rrugës do të vazhdojnë vitin e ardhshëm", - pohoi Rexha.
Përfundimi i punimeve brenda 90 ditësh
Kurse, sa i përket pjesës së parë të punimeve ai pohoi se kompania e cila do të kontraktohet për kryerjen e punimeve do t'i jepet afati prej 90 ditësh për përfundimin e tyre. "Punimet në pjesën e parë të punimeve do të përfundojnë gjithsesi sivjet dhe kompania e cila do të angazhohet për punimet në këtë rrugë do të ketë afatin prej 90 ditësh për përfundimin e tyre", - tha ai. Në anën tjetër, Muhamet Gashi, zëdhënës i Komunës së Prishtinës, ka vlerësuar se nuk janë vonuar në fillimin e punimeve për këtë rrugë, pasi që sipas tij, ajo rrugë është shumë e frekuentuar dhe gjatë punimeve duhet mbyllur disa segmente të rrugës. "Është lënë me qëllim që punimet të bëhen gjatë muajit korrik-gusht, kur edhe frekuentimi është më i vogël, pasi që është kohë e pushimeve", - pohoi Gashi.
Nënkalimet
Përveç, mosndërtimit të tërësishëm të rrugës, po ashtu edhe nënkalimet e parapara të ndërtohen sivjet në këtë rrugë nuk do të ndërtohen të gjitha sivjet. Nënkalimi paraparë të ndërtohet tek semaforët (përball tuneli), nuk do të ndërtohet sivjet pasi që është paraparë të ndërtohet, së bashku me pjesën e dytë të kësaj rruge që ka mbetur për vitin e ardhshëm. Ndërkaq, për nënkalimin i cili është paraparë të ndërtohet në afërsi të katedrales, zëdhënësi Gashi ka njoftuar se pritet që të brenda një jave të përzgjidhet kompania e cila do të bëjë punimet. "Ky nënkalim do të ndërtohet me koncesion dhe aty është paraparë të jetë edhe një qendër tregtare prej afër 7 objekteve tregtare për koncesionarin privat që do të futet në atë pjesë", - ka thënë Gashi.