[new wave]

Со енергетски менаџмент до сериозни заштеди за компаниите

Повеќе од 70-тина мали компании есенва треба да одлучат дали ќе се приклучат на слободниот пазар за електрична енергија...


Конкуренцијата меѓу лиценцираните компании ги скастри цените на струјата за компаниите од 20- тина до 40- тина насто, зависно од тарифниот модел што го одбрале.

Повеќе од 70-тина мали компании есенва треба да одлучат дали ќе се приклучат на слободниот пазар за електрична енергија

Во трката по повеќе клиенти за прв пат на пазарот енергетски менаџмент. Софтверски ќе се анализира потрошувачката, на местата каде што ќе се лоцираат поголеми трошоци ќе се бараат решенија за рационализација.

ЕНВ Снабдување нуди партнерски бизнис. Компаниите добиваат можност заштедата да ја насочат во инвестиции.

„Оваа услуга што ЕВН снабдување прв ја нуди на македонскиот пазар, ќе овозможи утврдување на сите точки во компаниите каде што може да се намали потрошувачката, а со тоа на компаниите им нудиме поддршка во нивниот развој и зголемување на нивната конкурентност“, вели извршниот директор на ЕВН Снабдување, Нико Барберу.

Двете фази на либерализација ги опфатија големите индустриски капацитети и средните бизниси. Вкупно 200 приватни и 20- тина државни компании со над 50 вработени и 10 милиони годишен приход трошат годишно 600 гигават часови. Од нив 120- тина со потрошувачка од 400 гигават часови склучиле договори со ЕВН снабдување.

Снабдувачите сеуште анализираат со каква атрактивна понуда ќе настапат пред домаќинствата вклучени во третата фаза од либерализацијата на пазарот на струја.

 

[Skopje/Скопје]

НОВ ЖИВОТ ЗА ХИДРОЦЕНТРАЛИТЕ

Со ревитализацијата вредна 35 милиони евра, целосно е заменета електромашинската опрема на трите централи „Вруток“, „Равен“ и „Врбен“

Киро Кипроски


Гостивар - Завршија големите инвестициски активности во нашиот најголем, најсложен и најраспространет хидроенергетски систем „Маврово“. Сите реконструктивни зафати кои почнаа пред 15 години чинат околу 35 милиони евра. Деновиве успешно заврши ревитализацијата на машинската, електронската и на другата опрема, која се одвиваше во фази, а производството на струја се одвиваше без да биде прекината работата на турбините. Во наредниве денови ќе биде извршено тестирање на вградената опрема за да се потврди нејзиниот инсталиран капацитет.

Како што вели Александар Левковски, раководител на гостиварската подружница ХЕЦ „Маврово“ на АД ЕЛЕМ, со овој крупен инвестициски зафат целосно е заменета електромашинската опрема на трите хидроелектрични централи „Вруток“, „Равен“ и „Врбен“, која се експлоатираше повеќе од половина век, од далечната 1957 година, а е инсталирана и дополнителна опрема за оскулација и набљудување на состојбата, стабилноста и сигурноста на браните и нејзините придружни објекти. Со ревитализацијата не само што е продолжен животниот век на постојните хидроелектрани за 40 години, туку е зголемена и инсталираната моќност за дополнителни 18,31 мегавати. Тоа ќе овозможи Мавровските хидроцентрали да го зголемат годишното производство на електрична енергија за над 50.000.000 киловат-часови.

„Бенефитот од ревитализацијата на 4 агрегати во ХЕЦ ’Вруток‘ и на 3 во ХЕЦ ’Равен‘ се добиени нови хидроелектрични централи, бидејќи старата опрема се експлоатираше повеќе од половина век и одржувањето беше скапо. Исто така, со реконструкција на доводот ’Шарски води‘, со санирање на ’Тољански тунел‘ и други помали зафати, Мавровскиот хидроенергетски систем ќе функционира како потполно нов“, вели Левковски.

Трите хидроелектрични централи „Вруток“, „Равен“ и “Врбен“ од идниот месец ќе произведуваат за 50 милиони киловат-часови поголемо количество електрична енергија со иста количина на вода. Ова е овозможено со зголемената инсталирана моќност. Особено е важно што со овие зафати значително се намалуваат трошоците за одржување на целокупната електронска и машинска опрема и на градежните објекти. Неколкуте зафати за реконструкција, санација и проширување на доводните органи, пролетва ги дадоа ефектите во заштедата на енергетската вода, а загубите на вода беа сведени на минимум. Секоја капка со помош на доводните органи се акумулира во Мавровско Езеро, а потоа се произведува во струја.

Со зголеменото производство на електрична енергија, со речиси 10 пати намалени трошоци за одржување на опремата и со заштедата на водниот потенцијал, гостиварската подружница ХЕЦ „Маврово“ на АД ЕЛЕМ се предвидува годишно да заработува по околу два милиона евра и вложените средства ќе бидат повратени за 7-8 години.

http://www.utrinski.mk/?ItemID=10BD8BA6E52ABB499AE81CAC4EC28F25

 

[new wave]

МЕПСО гради двосистемски далновод во Битола



АД МЕПСО денескa почна со поставување проводници од новиот двосистемски 110 кВ далновод кој ги поврзува трансформаторските станици ТС Битола 3 до ТС Битола 4, инвестиција вредна 2,3 милиони евра која опфаќа изградба на 12 километри комбиниран далновод поставен на 44 столбни места и дополнителни 600 метри подземен двосистемски кабел.

На денешната прес конференција во Битола, портпаролот на АД МЕПСО Никола Стојанов посочи дека станува збор за препоследната фаза од реализацијата на овој проект во кој се поставуваат проводниците на трасата, а потоа ќе бидат поставени интегрирано заштитно громобранско и оптичко јаже за трансфер на податоци.

- Овој далекувод, системски е многу важен, бидејќи со него ќе создадеме енергетски прстен околу трите битолски трансформаторски станици кои се на преносната мрежа. Со овој проект воедно значително ќе ја зголемиме доверливоста на нашиот електроенергетски систем и стабилноста на нашата преносна мрежа, истакна Стојанов.

Во функција на проектот, веќе се изградени и опремени со високонапонска опрема 5 далекуводни полиња од кои 2 во трансформаторските станици Битола 2 и Битола 3 и едно далекуводно поле во ТС Битола 1, потврди Стојанов.

- Во пелагонискиот регион се наоѓа најголемиот производител на електрична енергија во нашата држава, а со енергетскиот прстен околу Битола ќе ги сведиме на нула сите можни ризици од испад и без напонски состојби, истакна портпаролот Стојанов.

Од АД МЕПСО информираа дека во текот на вчерашниот ден е објавен меѓународен тендер за избор на консултант за изработка на проектите што се наопходни за да се реализира проектот за електроенергетско поврзување меѓу Битола и Елбасан, Албанија.

 

[Skopje/Скопје]

Нови седум километри гасоводна мрежа во Струмица

Гасоводната мрежа во Струмица продолжува да се развива. Локалната самоуправа потпиша договор со „Конти Хидропласт“ од Гевгелија за изградба на секундарна дистрибутивна гасоводна мрежа во должина од седум километри. Инфраструктурниот проект ќе се реализира во наредните 12 месеци, со што ќе се овозможи поголем број граѓани и компании да го употребуваат гасот како енергенс. Вредноста на оваа инвестиција изнесува 14 милиони денари, односно околу 230 илјади евра, финансиски средства обезбедени од буџетот на Општина Струмица.

Во рамките на проектот за гасификација на овој град, досега е изградена примарната гасоводна мрежа во должина од 15 километри, декомпресиска станица за гасот што се транспортира со цистерни од соседна Бугарија, мерно – регулациони станици и секундарна мрежа, на која веќе се приклучени станбени и индустриски објекти од десетина струмички улици.

http://www.build.mk/?p=35950

 

[new wave]

Смарт - бојлер целосно македонски производ и прв во Светот!



Компанијата Леов го произведе првиот „смарт“ бојлер во светот. Тоа значи дека не ви е потребен човек дома за да вклучи бојлер, туку тоа можете да го направите и преку мобилниот телефон за кој е креирана специјална апликација. Производот на македонскиот пазар ќе биде пуштен во септември.

-Бојлерот го изработи компанијата „Леов“, електронскиот термостат е на SMD, a ARANEA ја изработија мобилната апликација. Што значи дека овој производ е комплетно македонски. Идејата за истиот ја имам уште со појавата на смарт телефоните. Во овој брз начин на живот кога речиси нема човек дома, овој смарт бојлер ќе може да се вклучува од било каде преку мобилниот телефон. Секој може да го користи многу лесно, а известување односно нотификација за било каква команда ќе добиваат другите членови на семејството кои ја имаат апликацијата на мобилен телефон, изјави генералниот менаџер на компанијата „Леов“, Златко Леов.

Според перформансите, новиот електронски термостат на „смарт“ бојлерот заштедува дури 40 отсто електрична енергија за разлика од електромеханичкиот на старите модели. Бојлерот исто така има и четири нови функции антибактериска, има заштита од замрзнување, заштита од греење на суво и детектирање на грешка во сензорот.

-Електронскиот термостат е направен од најсовремени делови за да може да функционира беспрекорно. Не штедевме на неговата изработка која задоволува високи стандарди. Апликацијата за мобилниот телефон пак, може да се симне бесплатно, изјави Леов.

Компанијата Леов постои 30 години, извезува во 25 земји и освен во Европа имаат интенција да извезуваат и во Азија. Произведуваат во три града, а нивниот извоз изнесува 12 милиони евра.

Според претседателот на Стопанската комора, Бранко Азески иновативноста на компаниите е клучна за нивен развој и извоз, а компанијата „Леов“ е пример за другите компании и истата може да се носи со светските компании кои инвестираат во Македонија.

-Компанијата „Леов“ произведува прозводи кои се препознатливи и се бренд во регионот и Европа. Иновативноста, квалитетот, додадената вредност се клучните за извозот на македонските производи на светските пазари, изјави Азески.

 

[Skopje/Скопје]

Сите нови градби ќе мора да имаат приклучок за гас

Гасоводната инфраструктура ќе постане неизбежна при проектирањето и изградбата на новите објекти во земјава. Владата достави до Собранието измени и дополнувања на Законот за градење, со кои се предвидува секој нов објект да поседува приклучок за гас. „Со новиот предложен член 11-а се пропишува дека градбата треба да биде проектирана и изведена со приклучок за гасоводна инфраструктура. На овој начин ќе се овозможи сите нови градби да бидат подготвени за процес на гасификација, односно новите градби да можат да бидат непречено приклучувани на гасоводната мрежа“, објаснуваат од Министерството за транспорт и врски.

Македонската влада периодов трага по приватен партнер за изградба, одржување и управување со гасоводната дистрибутивна мрежа во скопскиот регион. Ако успешно се одвива јавно – приватното партнерство од овој крупен проект, дел од гасоводната инфраструктура во главниот град би била пуштена за користење веќе во 2016 година. Покрај во Скопје, приклучувањето кон веќе изградената гасоводна мрежа веќе втора година по ред успешно се одвива во Куманово и во Струмица.

http://www.build.mk/?p=36574

 

[Skopje/Скопје]

На плоштадот „Македонија“ се возеа електрични автомобили / New electric cars and electric bicycles in Skopje for rent

Од денес скопјани ќе може да ги користат новите електромобили и електровелосипеди. Цената на билетот за електромобилите изнесува 50 денари од лице, за една тура за разгледување, која во просек ќе трае 20 минути. Цената за изнајмување електровелосипед е 100 денари, за еден час, а ќе можат да ги возат само лица постари од 22 години.

Изнајмувањето и враќањето на електровелосипедите, пак, ќе биде исклучиво на плоштадот „Македонија" од 10 до 19 часот.

mkd.mk

 

[Skopje/Скопје]

Две нови инвестиции на МЕПСО за постабилна електроенергетска мрежа

Енергетската компанија МЕПСО денеска ги пушти во употреба новиот 440/110 киловолтен автотрансформатор во трансформаторската станица Скопје 5 и реконструираниот 110 киловолтен далекувод Скопје - Куманово.

Двете инвестиции се вредни четири милиони евра и со нив ќе го зголеми квалитетот на електричната енергија и ќе ги сведат на минимум ризиците од испади на електричната мрежа.

Автотрансформаторот чини 2,7 милиони евра, а со неговото ставање во функција ќе има два автотрансформатори, кои работат паралелно и имаат автоматска регулација на напон. Трансформаторот е изработен од материјали од најнова генерација, а производител е КРТ Загреб, дел од групацијата „Сименс“.

Кај реконструираниот 110 киловолтен далекувод Скопје-Куманово извршена е замена на постоечките со нови проводни јажиња во должина од 26 километри, а оваа инвестиција чини 1,3 милиони евра.

...

Во следниот период најави завршување на изградбата на 110 киловолтниот далекувод меѓу трансформаторските станици Битола 3 и Битола 4, како и 110 киловолтен далекувод меѓу хидроцентралата Вруток и трансформаторската станица Тетово 2. Наскоро ќе започне и изградбата на 400 киловолтен далекувод што ќе биде второ електроенергетско поврзување меѓу Македонија и Србија.

http://vlada.mk/node/9141

 

[Skopje/Скопје]

Ветропаркот „Богданци“ со удел од 1,4% во производството на електрична енергија

Со завршувањето на изградбата на ветерниот парк „Богданци“ се зголемува уделот на обновливата енергија во вкупното производството на електрична енергија во Македонија. Според податоците на Државниот завод за статистика, ветерните електрични централи во текот на мај 2014 година произвеле 6.191 MWh електрична енергија, што претставува удел од 1,4% во вкупното бруто домашно производство. Со реализацијата на овој енергетски проект се зголеми и учеството на обновливите извори на енергија во вкупното производство, кое во петтиот месец од годинава изнесувало 18,3%. Притоа, хидроелектраните со 16,5% и понатаму имаат најголем удел во продуцирањето на зелена енергија.

И покрај ваквите позитивни придвижувања, учеството на обновливата енергија во производството на електрична енергија силно варира, во зависност од хидролошката состојба во земјава. За споредба, во статистичкиот извештај „Одржлива енергија, 2014“ се наведува дека учеството на обновливата енергија во вкупната потребна енергија во 2012 година изнесувало 9,8% и истото се намалило во споредба со претходната година, поради падот на производството на хидроелектрична енергија. Во согласност со Европската стратегија за одржлив развој, 21% од потрошувачката на електрична енергија до 2020 година би требало да биде обезбедена од обновливи извори.

http://www.build.mk/?p=37335

 

[new wave]

Mnogu se super elektromobilite i elektrovelosipedite E-Skopje

 

[Skopje/Скопје]

Модернизираната ХЕ „Вруток“ годишно ќе произведува 50 GWh повеќе

Денеска беше свечено предадена во употреба модернизираната хидроелектрана „Вруток“, која е дел од Мавровскиот систем. Со ова воедно беше означен и крајот на втората фаза од проектот за ревитализација на шест хидроелектрани во државава. Во период од година и пол, австриската компанија „Андриц Хидро“ (Andritz Hydro) и словенечката „ЕТРА Колектор“ ги модернизираа сите четири агрегати и пропратната опрема во „Вруток“, со што инсталираната моќност порасна за 18,3 мегавати, а годишното производство со иста количина вода за околу 50 гигават часови. Покрај ваквото значително зголемување на ефикасноста на овој енергетски капацитет, со зафатот беше продолжен неговиот работен век за наредните три децении.

Овие активности се дел од проектот за ревитализација на шест големи хидроелектрани (Шпиље, Глобочица, Тиквеш, Вруток, Врбен и Равен) во вредност од 36,6 милион евра, кој во најголем дел е финансиран преку заем од германската „КфВ“ банка (27,1 милиони евра), а преостанатите 9,5 милиони евра ги обезбеди ЕЛЕМ.

http://www.build.mk/?p=37467

 

[Skopje/Скопје]

Огромен раст на производителите на обновлива енергија од сонцето

Македонските претприемачи пројавуваат голем интерес за инвестирање во соларните електрани и во малите хидроелектрани. Во периодот од март до почетокот на јули годинава во Регистарот на електроцентрали за производство на електрична енергија од обновливи извори се впишани дури 22 нови фотоволтаични електрани и две мали хидроелектрани. Агенцијата за енергетика констатира огромен пораст во бројот на овој вид енергетски објекти, кои во моментов се заокружени на 60 соларни електрани и 31 мали хидроелектрани. Од мартовските 8,33 мегавати, постојната вкупна инсталирана моќност на фотоволтаиците е зголемена на 11,42 мегавати, со очекувано годишно производство од 15.394 мегават часови електрична енергија.

Забележителен раст може да се увиди и кај малите хидроелектрани, каде што вкупната инсталирана моќност е зголемена за 5,85 мегавати до постојните 23,93 мегавати. Тие ќе ја користат водата како обновлив извор на енергија за да произведат 94.314 мегават часови електрична енергија. Според последните податоци на Државниот завод за статистика, уделот на обновливата енергија во вкупното производство на електрична енергија во Македонија во мај 2014 година изнесувал 18,3%.

http://www.build.mk/?p=37797

 

[Skopje/Скопје]

Ветерен парк кај Богданци

фотографии: Н. Батев (vecer.mk)

 

[Skopje/Скопје]

1,7 милиони евра за надзор над изградбата на гасоводот кон Неготино

Магистралниот гасовод Клечовце – Штип – Кавадарци – Неготино ќе почне да се гради во текот на претстојнава есен, а земјава ги реализира финалните подготовки за создавање услови за изведба на овој инфраструктурен проект. Министерството за транспорт и врски склучило договор со „ГЕИНГ Кребс унд Кифер Интернешнл“ за надзор над изградбата на ЛОТ 1 од мрежата на магистрални гасоводи, кој ја опфаќа трасата од кумановското село Клечовце до Неготино. За овие услуги се обезбедени финансиски средства во износ од 103.014.000 денари или околу 1,7 милиони евра. Договорот опфаќа временски период од 365 дена.

#Според последните информации околу изведбата на овој проект, магистралниот гасовод во должина од 60,7 километри најпрво ќе стигне само до Штип, додека дополнителни средства ќе треба да се одвојат за првично ветената траса до Кавадарци и Неготино. Финансиската конструкција на проектот изнесува 75 милиони долари, од кои 60 милиони долари произлегуваат од намирувањето на рускиот клириншки долг кон земјава. Останатите 15 милиони долари ќе се обезбедат од државниот буџет. Проценките се дека долгонајавуваниот магистрален гасовод ќе биде завршен најдоцна до јуни 2016 година.

http://www.build.mk/?p=38062

 

[Skopje/Скопје]

Ветерниците во Богданци произведоа над 40 гигавати струја

Како што информираат од Електрани на Македонија за околу 5 месеци тест-период испорачана е струја половина од планираното производство на годишно ниво

Од април годинава откога стартуваше пробното производство на електрична енергија од првиот парк на ветерни електрани „Богданци" произведени се над 40 милиони киловат-часови струја или 40 гигавати електрична енергија.

Како што информираат од Електрани на Македонија за околу 5 месеци тест-период испорачана е струја половина од планираното производство на годишно ниво.

ПВЕ „Богданци" очекува да се испорачуваат најмалку 100 гигават-часови природно одржлива енергија, што на годишно ниво е доволно за снабдување на домаќинствата на преку 60.000 граѓани на Република Македонија, или еден поголем град како Прилеп, Куманово, Тетово или Гостивар.

Ветерниците како значаен енергетски капацитет и прв од ваков вид во земјава, наскоро ќе влезат во редовно производство и ќе дистрибуираат електрична енергија во електроенергетскиот систем на земјава.

На локацијата Ранавец кај Богданци монтирани се сите 16 ветерници. Инсталираната моќност на секоја од нив е 2.3 мегавати, висината на столбот изнесува 80 метри, а дијаметарот на елисата изнесува 93 метри. Турбините се производство на Сименс - Данска и се вбројуваат меѓу најдобрите во својата класа.

Овој ветропарк во земјава го скрши мразот и ја вброи Македонија во земјите коишто произведуваат струја од ветер.

-Со овој проект ќе се зголеми и учеството на обновливите извори во портфолиото на ЕЛЕМ и претставува уште еден показател за грижата на компанијата кон животната средина-укажуваат од енергетската компанија.

Изградбата на ветропаркот на локацијата Ранавец стартуваше во мај лани. Проектот е вреден 55.5 милиони евра, а заемот од Владата на Сојузна Република Германија преку КФВ банката изнесува 47.9 милиони евра, додека 7.6 милиони евра веќе обезбеди.

http://vecer.mk/ekonomija/veternicite-vo-bogdanci-proizvedoa-nad-40-gigavati-struja

 

[new wave]

Во системите за наводнување ќе се вложат 200 милиони евра


Центарот за развој на Пелагонискиот регион, УСАИД Проектот за експанзија на мали бизниси – Карана корпорацијата денес организираа конференција посветена ХС Стрежево. Покрај градоначалниците од пелагонискиот регион и претставници од водостопнаските претпријатија од регионот, присуствуваше директорот на Управата за Водостопанство Кадир Салих како и Министерот за земјоделство Михаил Цветков.

Резултатите од досегашните анализи на ХС Стрежево укажуваат на тоа дека е потребно понатамошно вложување во овој систем, кој е еден од најсовремените во земјата, за негово обновување и реахбилитирање. До крајот на идната година предвидено е завршување на работите околу негово проширување на територијата на општините Могила и Новаци.

-Оваа година во Битола за ХС Стрежево се предвидуваат 80 милиони денари за обнова односно рехабилитација. Тој е еден од поновите најсовремени системи во РМ. И секако се предвидуваат 10 милиони денари средства за нови системи во Могила и Новаци на околу 4000 ха површина, изјави Михаил Цветков Министер за земјоделство .

Освен за водоснабдување , министертството до крајот на годината ќе издвои 7 милиони денари за чистење на 25 километри каналска мрежа за одводнување. Тендерот за овие активности е веќе завршен и се прават последните подготовки информираше денеска министерот Цветков.

-За оваа година во Битола министерството има одвоено 7 милиони денари за чистење на каналската мрежа за одводнување, тендерот е завршен и очекуваме дека до крајот на годината 25 километри од мрежата ќе се исчистат, додаде минисерот.

Попладневните часови од престојот во Битола министерот ги искористи за посета на парцела каде е поставен систем за наводнување капака по капка.

 

[Skopje/Скопје]

Заврши гасификацијата на болницата „8 Септември“ во Скопје

По минатогодишната гасификација на Клиничкиот центар, гасот како енергенс во секојдневното функционирање од денеска ќе го користи и градската болница „8 Септември“ во Скопје. Министерот за здравство Никола Тодоров информираше дека комплетно е завршен процесот на гасификација на здравствената установа, со која на годишно ниво ќе се заштедат од 150.000 до 200.000 евра. „Со користење на мазутот се исфрлаа 40 тони сулфур диоксид годишно во главниот град, а со користењето на гасот нула. Ова ќе влијае позитивно на животната средина и на воздухот во Скопје“ изјави Тодоров.

Во проектот за гасификација на градската болница досега се инвестирани над 500.000 евра. На тој начин, гасот во иднина ќе се користи за затоплување на објектот со површина од 52.000 метри квадратни. Инсталираните нови котли може да работат и на гас и на мазут, наспроти старите кои го користеа единствено мазутот при. Здравствената установа во минатите години вообичаено користеше од 1.000 до 1.500 тони мазут годишно, најмногу во зимскиот период, но и во остатокот од годината.

http://www.build.mk/?p=40200

 

[Skopje/Скопје]

9,7 милиони евра за нов далновод кон Србија

Македонскиот електропреносен систем оператор (МЕПСО) отпочнува со активностите за изградба на новиот 400 – киловолтен далновод што ќе ја поврзе нашата земја со Србија. Оваа високонапонска врска ќе ги спои трансформаторските станици во Штип и во Врање. Вкупната должина на далноводот ќе биде 70 километри и ќе биде поставен на 168 челично – решеткасти столбови што ќе се протегаат до македонско – српската граница кај Куманово. Инвестициската вредност на овој проект е 9,7 милиони евра, информираат од МЕПСО. Финансиите се обезбедени од кредитна линија на Светската банка и од сопствени средства на државната компанија.

Македонскиот премиер Никола Груевски денеска беше во работна посета на 400/110 kV трансформаторска станица Штип, каде што во моментов се врши монтажата на првиот столб на далноводот, со што и официјално започна остварувањето на првата фаза од проектот. За поставување на далноводот се избрани изведувачите „Енергомонтажа“ од Србија и „ЕЛ ТЕЛ Нетворк ТЕАБ“ од Шведска. Планираниот преносен вод е од големо стратешко и енергетско значење заради тоа што се воведува електроенергетска врска со Република Србија која ги зголемува капацитетите за пренос на електрична енергија и ја зголемува доверливоста на електроенергетските системи на регионално ниво.

http://www.build.mk/?p=41900

 

[Skopje/Скопје]

Богданскиот ветер лани „издува“ 70.000 мегавати струја

Во Македонија за прв пат годинава што измина се произведе електрична енергија од ветер. Земјава го доби првиот парк на ветерни електрани "Богданци" и со тоа го скрши мразот и се вброи во земјите кои ветерот го претвораат во струја. Производството стартуваше во април 2014 година и за 9 месеци произведени се над 70.000 мегават-часови струја или околу 70 гигавати електрична енергија.

Како што информираат од Електрани на Македонија (ЕЛЕМ) за овој временски период, кој што е наречен тест-период испорачана е струја за 77% од планираното производство што на годишно ниво е утврдено со Енергетскиот биланс.

Според анализите на енергетската компанија "Богданци" очекува за 12 месеци да испорачува најмалку 100 гигават-часови природно одржлива енергија, што на годишно ниво е доволно за снабдување на домаќинствата на преку 60.000 граѓани на Република Македонија, или еден поголем град како Прилеп, Куманово, Тетово или Гостивар.

Бројките како што велат експертите само потврдуваат дека ветерниците се веќе значаен енергетски капацитет и како прв од ваков вид во земјава, тие веќе дистрибуираат електрична енергија во електроенергетскиот систем на земјава.

На локацијата Ранавец кај Богданци монтирани се 16 ветерници, кои секоја од нив е со инсталираната моќност од 2.3 мегавати, а вкупната моќност се 36,8 мегавати.

Како што потсетуваат од ЕЛЕМ висината на столбот на една ветерница изнесува 80 метри, а дијаметарот на елисата изнесува 93 метри. Турбините се производство на Сименс - Данска и се вбројуваат меѓу најдобрите во својата класа.

Изградбата на ветропаркот на локацијата Ранавец стартуваше во мај 2013 година Проектот е вреден 55.5 милиони евра, а заемот од Владата на Сојузна Република Германија преку КФВ банката изнесува 47.9 милиони евра, додека 7.6 милиони евра веќе обезбеди.

Но инвестициите во ветерници се очекува да продолжат и во следните години, за што со одлука на Владата е одобрена вкупна моќност на овие енергетски објекти во годините што следуваат да бидат во континуиран пораст. Така до 31 декември 2016 година одобрена е вкупно е моќност од 65 мегавати, до 31 декември 2020 година до 100 мегавати и до 31 декември 2025 година вкупно 150 мегавати.

http://vecer.mk/ekonomija/bogdanskiot-veter-lani-izduva70000-megavati-struja

 

[new wave]

Рекордно производство на електрична енергија од хидро-централите

06.02.2015 15:00
Своевиден рекорд бил постигнат на 2-ри февруари кога наместо предвидените 2.258 гигават часови на електро- енергетскиот систем му биле испорачани 5.333, односно дури 136% повеќе од планираното...


Високиот дотек на вода во хидроакумулациите го крена производството на електрична енергија. Завчера хидроцентралите произвеле 23% струја повеќе од планираното. Наместо 6.995 гигават часови биле испорачани 8.669.

Вишокот струја на 3-ти февруари изнесувал 672 гигават часови. Сепак своевиден рекорд бил постигнат на 2-ри февруари кога наместо предвидените 2.258 гигават часови на електро- енергетскиот систем му биле испорачани 5.333, односно дури 136% повеќе од планираното.

Според најавите, ваквиот тренд на производство во хидро-централите ќе продолжи и во наредните денови, пред се поради рекордните дотеци во акумулациите, но и влажниот бран што повторно ја зафати земјава.