SkyscraperCity banner
1 - 3 of 3 Posts

·
Registered
Joined
·
6,218 Posts
Discussion Starter · #1 ·
Voi axuntar equí los artículos qu'espubliza Ismael González Arias sobre les comarques al sur de la cordolera Cantábrica qu'entá caltienen la so cultura asturllionesa viva. Son abondo interesantes, dellos tán recoyíos nun llibru nomáu "L'Asturies Cismontana", que toi acabante de lleer, y que se pue baxar de baldre nesta páxina: http://cismontana.ismael.org
La idega de ponelos equí ye porque'l llibru paecióme prestosu enforma y quiciás dalguién más tea interesáu en conocer estes comarques cismontanes.

 

·
Registered
Joined
·
6,218 Posts
Discussion Starter · #2 · (Edited)
La Babia Baxa


A los pies del Mons Vindius

La Babia Baxa, capital Santu Michanu, asela a los pies de la Penubina, la Peña Ubiña de los nuestros mapes de montaña y el Mons Vindius de les fontes clásiques, onde se refuxaran los ástures depués de perder la so capital, Lancia, y de cayer les defenses del Mons Medullius, ente les tierres de Cabreira, el Bierzu y La Somoza.

Ismael GONZÁLEZ ARIAS

Cuesta entender que los hestoriadores lleven media vida buscando la ubicación esacta del Mons Vindius que citen los romanos como'l llugar tres del que s'allugaran les tropes ástures pa preparar la defensa del territoriu Tresmontanu. Cuesta entendelo porque ye dalgo evidente pa cualquier viaxeru. Si los hestoriadores romanos refieren a ella como la principal estribación montañosa del territoriu de los ástures nun puen tar refiriéndose a otra que nun seya la Penubina por una razón bien clara: ye la elevación más evidente y el puntu de referencia más claru de tola cordelera ente l'Asturies Cismontana y l'Asturies Tresmontana.

Xovellanos, un viaxeru arriendes de munches otres más coses, yá lo dexara escrito nel so apunte de diariu de 27 de xunu de 1772: «La Peña Ubiña, que se cree ser la más alta de España. Vese desde tierra de Segovia y desde muy dentro del mar. Los de Cudillero, que navegan por ella, la llaman la Becerra».

La sonadía de ser la más alta d'España llegó hasta los nuestros díes. La xente mayor de los puertos inda lo recuerda. Munchos siguen tovía creyéndolo asina. Si una creencia como ésta fue a llegar hasta'l sieglu pasáu, ¿cómo nun diben tenela igual los romanos? Dende enantes de cruzar el ríu Esla yera la que marcaba'l puntu más altu de la raya del horizonte. Dende les tierres acabantes de conquistar de l'Astúrica Augusta ye la marca más clara, dexnado al llombu'l Telenu. Dende la ciudá sometida de Lancia, capital de los ástures cismontanos, la montaña ocupa'l llugar esactu del norte xeográficu. Dende la mesma mar, como Xovellanos comentó de la xente de Cuideiru, la Penubina siguía siendo'l faru de guía.

Con toos estos datos, evidente pal viaxeru que percuerre la Meseta o que cruza la mar, los hestoriadores siguen enllenando páxines d'ensayu a «la recherche de la montaigne perdue». Como dicen en Babia, y en tantes otres partes: nun hai peor ciegu que'l que nun quier ver. Demientres siguen dando vueltes alredor de los llibros, cualquier vieyu pastor treshumante estremeñu o babianu podría conta-y que dende la mesma xerra de Francia, nos díes claros, la Penubina siguía amosándo-yos onde taba'l so llar, los d'él, la so tierra.

La Penubina sigue siendo la montaña asturiana por escelencia. La Peña Santa (Torre Santa pa los de la parte Lleón) yera la seña d'identidá d'otru territoriu, el de los vadinienses, hermanaos a los ástures na guerra contra los romanos. Agora sonlo en xunto los Picos d'Europa.

La Babia Baxa

El conceyu otrora nomáu Babia de Yuso y agora Santu Michanu ta integráu polos siguientes núceos de población: Candemuela, Gospedal, La Maxúa, Pinos, Riul.lagu, Robleo, Santu Michanu, Torrebarriu, Torrestíu, Truébanu, Vil.lafliz, Vil.largusán, Vil.lasecín y Xenestousa. La vista dende lo alto'l puertu Ventana amuesa la unidá d'un territoriu integráu por un valle altu y ampliu cerráu ente la propia Penubina y la Mesa, pela parte d'Asturies, la xerra los Glachos, al Este, y la mole de Pena Correa, al Sur, separtándola de La Oumaña.

Siempre recomiendo Babia al que vien de fuera con ganes de conocer Asturies. La publicidá fala del Paraísu Natural. El que con esta premisa cruza pela autopista del Güerna y topa con La Pola L.lena, Uxo, Mieres, Olloniego y La Ribera d'Arriba, de xuru tien de pensar que s'equivocó o que lu engañaron. Nun hai territoriu más ayenu a lo que podría entendese como un paraísu natural que la comarca del Caudal a lo llargo, al pie de l'autovía de la Plata. Por eso siempre cuento a los viaxeros que s'animen a entrar n'Asturies que la meyor forma de conocer l'Asturies de la que fala la publicidá ye entrando por Babia.

El percorríu ideal pa un fin de selmana nel paraísu pasa per estes tierres. Sales de l'autopista del Güerna a l'altor del ponte atirantáu del pantanu de L.luna y garres la carretera de Vil.lablino. A poco de pasar Sena de L.luna, nel llugar que custodia baxo les peñes la ermita de Prunea, ábrese la tierra de Babia Baxa. Cruzándola entera apórtase a la Babia Alta. Dende ehí allégase aína, pasando'l puertu de Somiedo, al conceyu asturianu d'esti nome (que tamién-y da nome al parque nel que s'afaya). Dende ellí, pel puertu de San L.lorienzu, pásase a Teberga. Y, dende ésta, pel puertu Ventana, báxase a Santu Michanu y de nuevo volvemos tar na Babia Baxa. Una vuelta asina si nos pue dar idea más cierta del paraísu natural.

Les tierres de Babia tan encerraes ente dos santuarios: el de Carrasconte, que la separta de L.laciana, y de Prunea, que marca la llende con L.luna. La pequeña ermita de Prunea ye del sieglu XV y marca dende antiguo'l pasu obligáu del Camín Real del puertu de La Mesa, la principal vía de comunicación ente les dos Asturies, la Tresmontana y la Cismontana, dende los tiempos de los ástures y los romanos hasta primeros del sieglu XIX (cuando yá empezaron a competir con ella los puertos de Payares y San Isidru, y depués los de Ventana y de Somiedo). Dende la ermita de Prunea hasta l'altu mesmu de La Mesa, a distancia siempre d'una llegua, una ermita marcaba'l camín: un abellugu necesariu pa los arrieros, vaqueiros, comerciantes y viaxeros que s'atrevíen a averase a l'Asturies Tresmontana.

Que la Babia Baxa ye tierra vaqueira yá da cuenta d'ello'l mesmu Xovellanos cuando refier a los que vivíen nos pueblos de Torrestíu, Saliencia (Somiedo) y La Foceil.la (Teberga). Les sos brañes siguen falándonos de los tiempos de la treshumancia. Torrestíu sigue siendo un llugar frecuentáu, porque ye la vía d'accesu obligada a los que quieren volver revivir la esperiencia d'entrar n'Asturies de la manera más natural, pel puertu de La Mesa. Atendiendo siempre a la situación del tiempu. Falamos d'una tierra alta a la que la ñeve dexa trancada llargues temporaes, por más que les modernes quitañeves faigan una impresionante llabor nos nuestros díes. Dos selmanes enantes d'esta Selmana Santa tovía daba problemes a los coches allegase ellí. Pero, como'l puertu Ventana suel tar abiertu tol añu, tampoco ye mala idea dexar el coche onde l'indicador del pueblu y averase a pie hasta les primeres cases del pueblu.

Son muchos otros los pueblos que, baxo les estribaciones d'estes montañes, conserven l'encantu y la dureza de la vida de los pastores d'alta montaña. Les hestories que siempre me contara la cantadora de tonada Diamantina Rodríguez faen referencia al pueblu de Gospedal, onde trabayara de pastora pel tiempu de la guerra civil. Los pastos altos del pueblu, averaos a los de llugares como Robleo y La Maxúa, anden alredor de los dos mil metros.

Pero, agora, amás, frutu de los tiempos que cuerren, munchos de los pueblos, empezando pola so cabeza, cuentan con una bona infraestructura hostelera. Nun hai nada como utilizala pa poder tener cerca'l llugar de descansu pa atrevese con rutes como la del Camín Real del puertu de La Mesa o al delláu d'ella la del altu La Farrapona, que te lleva hasta los llagos de Saliencia, la subida al puertu Pinos (propiedá del Ayuntamientu de Mieres nesti conceyu) o la subida al altu de la Cañada, per enriba de Riul.lagu.
 
1 - 3 of 3 Posts
Top